Fondacioni “Valon Vataj” do të ndërtojë në Suharekë qendrën më inovative në rajon për fëmijët me Sindromë “Down” dhe Autizëm

Në muajin dhjetor të këtij viti pritet të nisin  punimet për një ndër projektet më të rëndësishme në komunën e Suharekës.

Kjo pasi sot Valon Vataj, përfaqësues i Fondacionit “Valon Vataj” dhe kryetari i Komunës së Suharekës, Bali Muharremaj, nënshkruan memorandum bashkëpunimi për ndërtimin e një Qendre rekreative për fëmijët me Sindromin “Down” dhe me autizëm.

Kjo qendër rekreative pritet të jetë ndër më inovativet në rajon me synim krijimin e kushteve sa më të mira për fëmijët me nevoja të veçanta, për mundësive për integrim në shoqëri.

Përfaqësuesi i Fondacionit, Valon Vata, tha se prej kohësh e ka ndjerë nevojën për t’u dalë në ndihmë fëmijëve me nevoja të veçanta, pasi sipas tij kjo shtresë e shoqërisë ka nevojë për krijim të barabartë të mundësive dhe përkrahjen e të gjithëve.

Ndërsa Kryetari i Komunës, Bali Muharremaj, tha se ndërtimi i qendrës rekreative për fëmijët me nevoja të veçanta është një projekt shumë i nevojshëm për Suharekën, dhe u shpreh krenar me djemtë e kësaj komune, siç është Valoni, të cilët pa marrë parasysh se ku veprojnë, gjithmonë i dalin në ndihmë njerëzve në nevojë të kësaj komune.

Ndërtimi i kësaj qendre pritet të fillojë më 3 dhjetor dhe ka një kosto prej 500 mijë euro./Teleskopi.info