Interi gati me portier të ri

Braziliani Gabriel Brazao po shihet si trashëgimtari i Samir Handanovic te Interi.

Drejtuesit zikaltër mësohet se e kanë mbyllur marrëveshjen për “gardianin” e ri të Cruzeiros, i datëlindjes 2000, që po i mahnit të gjithë me paraqitjet e tij.

Një operacion që do t’u kushtojë arkave të Interit 2.5 milionë euro. Në fakt, futbollisti nuk do t’u bashkohet menjëherë zikaltërve, pasi do të huazohet te Chievo deri në fund të sezonit, para se të firmosë kontratë 5-vjeçare me klubin italian.

Një goditje e rëndësishme dhe e perspektivës, pasi Brazao konsiderohet një nga talentet më të spikatur në qarkullim në rolin e portierit.

Firmosja e marrëveshjes do të ndodhë në Kili, aty ku portieri në fjalë është i angazhuar më përfaqësuesen U-20 të Brazilit.