SBASHK: Ndryshime sa për të thënë, diskriminimi vazhdon

Pas konsultimeve me kryetarët e nivelit komunal sindikal e të universiteteve, SBASHK-u ka reaguar lidhur me ndryshimet në Ligjin për skemat pensionale të financuara nga shteti.

Përmes një komunikate për medie, SBASHK ka deklaruar se Qeveria Kurti duke u trimëruar me numrin e votave vazhdon të nxjerr ligje e të bëj ndryshime në ligje pa bërë konsulta me palët që preken me këto vendime e ligje.

Sipas kësaj sindikate, një veprim i tillë ka ndodhur edhe me Projektligjin për ndryshimet në Ligjin për skemat pensionale të financuara nga shteti.

“SBASHK-u në pritje që do të ftohen sindikatat nga komisioni dhe Ministri Murati për të ofruar propozime të argumentuara lidhur me këto ndryshime kishte përgatitur argumente, fakte e propozime konkrete , që do të bënin zgjidhje të përhershme dhe të drejtë për të gjitha palët që preken me këtë Ligj. Mirëpo, Qeveria vazhdoi me qasjen e gabuar e me kryeneçësinë dhe u votuan ndryshime sa për të thënë e teksa diskriminimi vazhdon dhe zgjidhjet janë afatshkurta e të padrejta. Me këto ndryshime preken ligjet tjera, siç është rasti me Ligjin për statutin e punëtorëve të arsimit të viteve të 90-ta, i cili si vite kontributdhënëse ua njihte atyre që punuan në sistemin arsimor të Republikës së Kosovës kohën nga viti shkollor 1989 e deri më 31 tetor 1999, kur edhe kishte përfunduar viti shkollor, që ishte zgjatur me vendimin e organeve të Kosovës të asaj kohe”, thuhet në reagim .

SBASHK-u tutje sqaron se me këto ndryshime është dashur që si vite kontribut-dhënëse, përveç vitet e 90-ta, të njihen edhe koha deri më 1 shtator 2002 , gjegjësisht deri në kohën kur filli se funksionuari ‘Trusti pensional’, sepse të punësuarve deri atëherë nuk u ishte krijuar mundësia institucionale për të ndarë kontribute pensionale.

“Qeveria Kurti po të donte ndryshime pozitive në këtë Ligjin për skemat pensionale nuk ka pasur nevojë të thirret në krijesat e se kaluarës sepse punëtorët arsimor, por edhe shumica e qytetarëve që moti e sidomos në fillimet e viteve të 90-ta kishin nisur rrugëtimin dhe në dëftesa e libreza nxënësish shkruante Republika e Kosovës dhe pastaj edhe UÇK-ja me gjak e sakrifica hodhi gurthemelet për shtetin e Kosovës”, vë në dukej SBASHK, teksa shton se nëse Qeverisë Kurti i ka mbetur merak ky kriteri prej 15 vitesh, atëherë për të mos pasur diskriminim është dashur të bëhet një përshkallëzim në ketë forme:1. 15 vite 100%2. 13 deri 15 vite 75%3. 10 deri 13 vite 50 % e kështu me radhë sepse pa kaluar shumë kohë do të vërehet se ata që do të kenë , qoftë edhe dy ditë me pak nga këto 15 vite kontrubutdhënëse do të mbesin me pensionin e pleqërisë.

SBASHK-u, mes tjerash, fton presidenten Osmani që të mos dekretojë këtë Projektligj të ndryshimeve, por ta kthej në Parlament në mënyrë që, përmes dialogut me të gjitha palët e duke u bazuar në fakte e argumente, të bëhen ndryshime duke hequr çdo diskriminim e padrejtësi ndaj kujtdo qoftë.